اسلام آباد: وفاقی ترقیاتی ادارے کیپیٹل ڈویلپمنٹ اتھارٹی (سی ڈی اے) کا دارالحکومت میں غیر قانونی طور پر آباد افغان آبادیوں اور تجاوزات کےخلاف آپریشن جاری ہے۔
تفصیلات کے مطابق سی ڈی اے کے چیئرمین کیپٹن (ر) انوارالحق کی ہدایات پر انسداد تجاوزات آپریشن تیزی سے جاری ہے۔ اس ضمن میں انفورسمنٹ ڈائریکٹوریٹ نے دیگر شعبوں کی معاونت سے بدھ کے روز نسٹ یونیورسٹی سیکٹر I-12/2 کے قریب عرصہ دراز سے قائم غیر قانونی افغان بستی کے خلاف ایک میگا آپریشن کا انعقاد کیا۔ لہذا بھاری مشینری کا استعمال کرتے ہوئے سینکڑوں کمرے اور متعدد مویشیوں کے باڑے مسمار کردیئے گئے۔ اس آپریشن کے نتیجے میں 250 کنال اراضی واگزار کروا کر سیکٹر ڈویلپمنٹ کے حوالے کردی گئی تاکہ ترقیاتی کاموں میں تیزی لائی جاسکے۔
مزید برآں ضلعی انتظامیہ اور اسلام آباد پولیس کی معاونت سے مارگلہ ٹاون فیز ٹو نزد زرعی ترقیاتی بنک پلاٹ جہاں پر عرصہ دراز سے غیر قانونی افغان بستی قائم تھی. بھاری مشینری کا استعمال کرتے ہوئے درجنوں مکانات اور مویشیوں کے باڑے مسمار کردئیے گئے اور سرکاری اراضی واگزار کر والی گئی۔
علاوہ ازیں کرنل شیر خان ایونیو منڈی موڑ کے علاقے سے عوامی شکایات کی روشنی میں سڑک کے دونوں اطراف تجاوزات کے خلاف بھرپور کارروائیاں عمل میں لاتے ہوئے روڈ کو کلئیر کروا دیا گیا۔ اور 6 ٹرک سامان بحق سرکار بھی ضبط کر لیا گیا۔
مزید خبروں اور اپڈیٹس کیلئے وزٹ کیجئے گرانہ بلاگ
