اسلام آباد: وفاقی ترقیاتی ادارے کپیٹل ڈویلپمنٹ اتھارٹی (سی ڈی اے) کے چیئرمین نور الامین مینگل کی ہدایات پر اسلام آباد کو غیر قانونی تعمیرات اور تجاوزات سے پاک رکھنے کے لئے انسداد تجاوزات آپریشن بھر پور طریقے سے جاری ہے۔
تفصیلات کے مطابق اس سلسلے میں بھیکہ سیداں میں بھر پور کارروائی عمل میں لائی گئی۔ اور سرکاری اراضی پر قائم تجاوزات کو ختم کردیا گیا۔ آپریشن میں انفورسمنٹ ڈائریکٹوریٹ، لینڈ و بحالیات، اسلام آباد انتظامیہ اور اسلام آباد پولیس نے حصہ لیا۔ بھیکہ سیداں میں سرکاری اراضی پر تعمیر کردہ 180 کمرے، 40 واش رومز اور 22 کچن سمیت 30 چار دیواریوں کو بھاری مشینری کی مدد سے مسمار کردیا گیا۔ نیز اس آپریشن کا مقصد سیکٹروں کے لئے ایکوائر کردہ زمین سے تجاوزات کو ختم کرکے ترقیاتی کاموں کو مکمل کرنا ہے۔
مزید یہ کہ چیئرمین کپیٹل ڈویلپمنٹ اتھارٹی کیپٹن نور الامین مینگل نے کہا کہ تجاوزات کو ختم کرکے بھیکہ سیداں میں باقی ماندہ ترقیاتی کاموں کو جلد از جلد مکمل کیا جائے۔ علاوہ ازیں، ان کا مزید کہنا تھا کہ سیکٹرز کے لئے ایکوائر کردہ اراضی سے تجاوزات کے خاتمے تک آپریشن بلا تفریق جاری رہے گا۔
واضح رہے گزشتہ کئی ماہ سے کپیٹل ڈویلپمنٹ اتھارٹی کی انتظامیہ غیر قانونی تعمیرات اور تجاوزات کے خلاف آپریشن کرنے میں مصروف ہے۔ اس کے نتیجے میں اربوں روپے کی سرکاری اراضی واگزار کروائی جاچکی ہے۔ اور سرکاری اراضی پر غیر قانونی قابضین کے خلاف یہ آپریشن تسلسل کے ساتھ جاری رہے گا۔
مزید خبروں اور اپڈیٹس کیلئے وزٹ کیجئے گرانہ بلاگ۔
