اسلام آباد: وفاقی ترقیاتی ادارے (سی ڈی اے) نے سہالہ فلائی اوور کی تعمیر کا منصوبہ فرنٹیئر ورکس آرگنائزیشن کو تفویض کر دیا ہے۔ ایف ڈبلیو او سہالہ فلائی اوور منصوبے کو قبل از وقت مکمل کرنے کے لیے پُرعزم ہے۔
سہالہ فلائی اوور کہوٹہ روڈ پر تعمیر کیا جائے گا جبکہ وفاقی ترقیاتی ادارے سی ڈی اے اور ایف ڈبلیو او نے مذکورہ تعمیراتی منصوبے کے تعمیر سے متعلق معاہدے پر دستخط بھی کر دیے ہیں۔
سی ڈی اے حکام کا کہنا ہے کہ یہ منصوبہ ایک نجی تعمیراتی کمپنی کو 77 کروڑ روپے میں تفویض کیا گیا تھا تاہم ایک سال سے زائد عرصہ گزرنے کے باوجود تعمیراتی کمپنی منصوبے کی تعمیر پر کوئی خاطر خواہ کارکردگی نہ دکھا سکی۔
یہ اوور ہیڈ بریج کاک پل سے کہوٹہ کی جانب تقریبا ً 6 کلومیٹر کے فاصلے پر ریلوے لائن کے اوپر تعمیر کیا جائے گا۔
سہالہ فلائی اوور کی لمبائی 1800 فٹ جبکہ اپروچ روڈ کی لمبائی 900 فٹ ہو گی۔ سہالہ کہوٹہ روڈ پر ٹریفک کے درپیش مسائل کی وجہ سے فلائی اوور کی تعمیر علاقے کے رہائشیوں کا دیرینہ مطالبہ تھا۔
حکام کا کہنا ہے کہ اس فلائی اوور کی تعمیر سے نہ صرف ٹریفک کے مسائل حل ہوں گے بلکہ اس سے علاقہ مکینوں کی زندگیوں میں بھی آسانیاں پیدا ہوں گی۔
مزید خبروں اور اپڈیٹس کیلئے وزٹ کیجئے گرانہ بلاگ
