اسلام آباد: سی ڈی اے کا سیکٹر C-13 کیلئے بلٹ اَپ ایوارڈ کا اعلان

اسلام آباد: وفاقی ترقیاتی ادارے کیپیٹل ڈویلپمنٹ اتھارٹی نے سیکٹر C-13 کے لیے بلٹ اپ پراپرٹی ایوارڈ کا اعلان کیا ہے۔ بلٹ اپ پراپرٹی ایوارڈ کا مطلب ان لوگوں کو معاوضہ ادا کرنا ہے، جن کے گھر یا ڈھانچے اس مقام پر موجود ہیں جہاں کی زمین حاصل کی گئی ہو۔

تفصیلات کے مطابق سیکٹر C-13 مارگلہ ہلز نیشنل پارک کے دامن میں واقع ہے۔ اور اسے نئے افتتاح شدہ مارگلہ ایونیو سے براہ راست رسائی ہوگی۔ تاہم، بلٹ اپ پراپرٹی ایوارڈ کا یہ عمل ماضی میں متنازعہ رہا ہے۔ پالیسی کے مطابق سی ڈی اے ان لوگوں کو پلاٹ دیتا ہے جن کے پاس ان کے گھر یا جائیدادیں ہیں۔ لہٰذا ان کی بحالی کے فائدے کے طور پر اس عمل کو بہت زیادہ دیکھ بھال کی ضرورت ہے۔

تفصیلات کے مطابق سیکٹر C-13 کے بی یو پی کے ابتدائی سروے میں تقریباً 2800 بوگس اندراجات سامنے آئے۔ تاہم اعلیٰ حکام کی جانب سے ایک کمیٹی تشکیل دی گئی جو ڈپٹی کمشنر سی ڈی اے اور آئی سی ٹی انتظامیہ کے سینئر افسران پر مشتمل تھی۔ لہٰذا کمیٹی نے جانچ پڑتال کے بعد صرف 328 افراد کو کلیئر کیا اور انہیں مزید اے، بی، سی اور ڈی کی فہرستیں بنا کر چار کیٹیگریز میں رکھا۔ بغیر کسی کارروائی کے پلاٹ کے لیے اہل قرار پانے والے 328 افراد کو لسٹ اے میں رکھا گیا ہے، جبکہ 108 افراد کو لسٹ بی میں رکھا گیا ہے جو مخصوص دستاویزات فراہم کرنے کے بعد پلاٹ کے اہل ہوں گے۔

دریں اثنا، فہرست سی میں رکھے گئے لوگ کسی بھی معاوضے کے اہل نہیں ہوں گے۔ کیونکہ ان کے ڈھانچے کو مذکورہ سیکٹر کے لیے اراضی کے حصول کے بعد اٹھایا گیا تھا۔ جبکہ لسٹ ڈی میں جگہ پر موجود کنویں اور ہینڈ پمپ شامل تھے۔ اس سے قبل اجلاس میں سیکٹر C-13 کا PC-1 پیش کیا گیا۔ اجلاس میں بتایا گیا کہ اس سیکٹر میں ہائی رائز بلڈنگ اپارٹمنٹس رکھے گئے ہیں۔ اور یہ سیکٹر اسلام آباد کے خوبصورت ترین مقام پر واقع ہے، اس کی خوبصورتی کو مدنظر رکھتے ہوئے منصوبہ بندی کی گئی ہے۔ جس کی لاگت کا تخمینہ 1078 ملین روپے لگایا گیا ہے۔

مزید خبروں اور اپڈیٹس کیلئے وزٹ کیجئے گرانہ بلاگ