کھاریاں-راولپنڈی موٹروے کو اسلام آباد ایکسپریس وے سے نہ جوڑنے کی تجویز

اسلام آباد ہائی وے پر ٹریفک کے دباؤ کی وجہ سے سی ڈی اے کی جانب سے این ایچ اے کو تجویز دی گئی ہے کہ کہ کھاریاں تا راولپنڈی موٹروے کو اسلام آباد ہائی وے سے منسلک نہ کیا جائے۔

ذرائع این ایچ اے حکام نے خط موصول ہونے کی تصدیق کرتے ہوئے بتایا کہ سی ڈی اے کی جانب سے لکھے گئے خط میں کہا گیا ہے کہ سیالکوٹ، لاہور، کھاریاں اور دیگر شہروں سے خیبرپختونخواہ، شمالی علاقہ جات، مری اور کشمیر جانے والی ٹریفک اسلام آباد ہائی وے سے وفاقی دارالحکومت میں داخل ہو گی اور کھاریاں تا راولپنڈی موٹروے سے منسلک ہونے کے باعث اسلام آباد ہائی وے پر ٹریفک کے رش میں قدرے اضافہ ہو گا۔

سی ڈی اے حکام کا کہنا ہے کہ اسلام آباد ہائی وے پر پہلے ہی مقامی ٹریفک اور ہیوی ٹریفک کا خاصا رش ہوتا ہے۔ ان کا کہنا تھا زیرِتعمیر یا تعمیرشدہ رہائشی منصوبوں کی بڑی تعداد اس شاہراہ کے اطراف موجود ہے جس کے باعث ہزاروں گاڑیاں روزانہ اسلام آباد میں داخل ہوتی ہیں۔ علاوہ ازیں کھاریاں تا اسلام آباد موٹروے منصوبے کے لیے وفاقی دارالحکومت کے ماسٹر پلان میں تبدیلی کی ضرورت درپیش ہو گی جس کے لیے وفاقی حکومت کی منظوری ضروری ہے۔

سی ڈی اے کی جانب سے لکھے گئے خط میں تجویز پیش کی گئی کہ موٹروے کو جی ٹی روڈ کے ذریعے راولپنڈی رنگ روڈ سے منسلک کیا جائے۔ یوں اسلام آباد کے ماسٹر پلان میں تبدیلی کی ضرورت بھی پیش نہیں آئے گی اور جڑواں شہروں میں ٹریفک کے دباؤ میں بھی اضافہ نہیں ہو گا۔

مزید خبروں اور اپڈیٹس کیلئے وزٹ کیجئے گرانہ بلاگ۔