دو نجی ہاؤسنگ اسکیموں کے بُکنگ آفس سربمہر: آر ڈی اے

راولپنڈی ڈویلپمنٹ اتھارٹی (آر ڈی اے) نے بروز منگل دو غیرقانونی نجی ہاؤسنگ اسکیموں کے دفاتر سربمہر کر دیے۔

حکام کے مطابق ڈائریکٹر جنرل آر ڈی اے محمد سیف انور جپہ کی ہدایت پر میٹروپولیٹن پلاننگ اینڈ ٹریفک انجینئرنگ (ایم پی اینڈ ٹی ای) ڈائریکٹوریٹ نے نیو ایئرپورٹ اسلام آباد اور کمرشل مارکیٹ راولپنڈی کے قریب موضع تھلیاں میں غیر قانونی رہائشی منصوبوں کے بکنگ دفاتر کو سربمہر کر دیا۔

حکام کا کہنا تھا کہ غیر قانونی ہاؤسنگ سکیموں کے مالکان پنجاب پرائیویٹ ہاؤسنگ سکیم رولز 2021 کی خلاف ورزی کرتے ہوئے ان رہائشی منصوبوں کی پیشگی منظوری کے بغیر بکنگ آفس چلا رہے تھے۔

آر ڈی اے حکام نے بتایا کہ ڈی جی کی ہدایت پر غیر قانونی ہاؤسنگ سکیموں کی غیر قانونی تشہیر کے خلاف کارروائی جاری ہے۔ آر ڈی اے کی جانب سے غیر قانونی ہاؤسنگ پراجیکٹس کے مالکان کو نوٹسز بھی جاری کیے جا چکے ہیں۔

حکام کا کہنا تھا کہ آر ڈی اے نے قواعد کی خلاف ورزی کرنے والوں کے خلاف ایف آئی آر بھی درج کروائی ہے۔

آر ڈی اے حکام کا کہنا تھا کہ غیر قانونی ہاؤسنگ سکیموں کے مالکان اور اسپانسرز اشتہارات کے ذریعے عوام کو گمراہ کر رہے ہیں، اس سلسلے میں آر ڈی اے کے پلاننگ ونگ نے ایف آئی اے کے سائبر کرائم ونگ سے بھی درخواست کی کہ وہ غیر قانونی اور گمراہ کن رہائشی اسکیموں کی تشہیر کے خلاف قانونی کارروائی کرے۔

انہوں نے کہا کہ ڈی جی نے متعلقہ محکموں بشمول پارکس اینڈ ہارٹیکلچر اتھارٹی، لوکل گورنمنٹ اور راولپنڈی کنٹونمنٹ بورڈ سے بھی درخواست کی ہے کہ وہ غیر قانونی ہاؤسنگ سکیموں کے اشتہارات کی منظوری نہ دیں۔ انہوں نے مزید کہا کہ لوگوں کو دھوکہ دہی سے بچانے کے لیے آر ڈی اے سے پیشگی منظوری کا لیٹر طلب کیا جا سکتا ہے۔

حکام کے مطابق کہ ڈی جی آر ڈی اے نے شہریوں کے لیے بھی پیغام دیا کہ وہ غیر قانونی اور غیر مجاز ہاؤسنگ اسکیموں میں سرمایہ کاری نہ کریں اور آر ڈی اے کی آفیشل ویب سائٹ rda.gop.pk پر کسی بھی سرمایہ کاری سے قبل رہائشی منصوبوں کی قانونی حیثیت کی تصدیق کر لیں۔

مزید خبروں اور اپڈیٹس کیلئے وزٹ کیجئے گرانہ بلاگ۔