اسلام آباد: مارگلہ ہلز نیشنل پارک میں بون فائر، بار بی کیو اور درختوں کی کٹائی پر پابندی

اسلام آباد: وفاقی دارالحکومت میں مارگلہ ہلز نیشنل پارک پر بار بی کیو، تمباکو نوشی، بون فائر، آگ جلانے، کوڑا کرکٹ، پلاسٹک پھینکنے، اور لامحدود اشیاء لے جانے پر پابندی عائد کر دی گئی ہے۔

تفصیلات کے مطابق ایڈیشنل ڈسٹرکٹ مجسٹریٹ شہریار عارف خان کی جانب سے جاری کردہ حکم نامے کے مطابق لائٹر، چارکول، ماچس، پٹرول/مٹی کے تیل کی بوتلیں لے جانے اور درختوں کی کٹائی منع ہے۔ یہ تمام وجوہات مارگلہ ہلز نیشنل پارک میں جانوروں کی رہائش گاہوں کے نقصان، آلودہ پانی، صفائی اور ٹوٹ پھوٹ کا باعث بن رہی ہیں۔

ڈسٹرکٹ مجسٹریٹ کے دفتر سے جاری اس حکم کا مقصد نیشنل پارک کو مزید تنزلی سے بچانا ہے۔ اور اس کے ماحولیاتی توازن کو برقرار رکھنا ہے۔ ایڈیشنل ڈسٹرکٹ مجسٹریٹ نے اپنے اختیارات کا استعمال کرتے ہوئے وفاقی دارالحکومت کے دائرہ اختیار میں ان سرگرمیوں کو ممنوع قرار دیا ہے۔ علاوہ ازیں، سرکاری خط کے مطابق پابندی فوری طور پر نافذ العمل ہوگی اور دو ماہ تک نافذ رہے گی۔

مزید برآں، حکم نامے کی سرکاری گزٹ اور مقامی اخبارات میں اشاعت کے ذریعے اور پبلسٹی کے دیگر تمام ذرائع ابلاغ پر تشہر کی جائے گی۔ نیز دارالحکومت اسلام آباد میں نمایاں جگہوں پر کاپیاں چسپاں کرکے وسیع پیمانے پر تشہیر ہو گی۔

اس آرڈر کا مقصد مارگلہ ہلز نیشنل پارک کی حیاتیاتی تنوع کو تحفظ فراہم کرنا ہے۔ اور اس بات کو یقینی بنانا ہے کہ یہ آنے والے برسوں تک ایک اہم ماحولیاتی سائٹ بنی رہے۔

مزید خبروں اور اپڈیٹس کیلئے وزٹ کیجئے گرانہ بلاگ۔