اسلام آباد: وفاقی ترقیاتی ادارے (سی ڈی اے) نے بہارہ کہو بائی پاس کی تعمیر کا ٹھیکہ نیشنل لاجسٹک سیل (این ایل سی) کے سُپرد کر دیا۔
حکام کے مطابق سوموار کے روز بِڈنگ کا عمل شروع کیا گیا جس میں صرف وفاقی ترقیاتی کمپنیوں فرنٹئیر ورکس آرگنائزیشن (ایف ڈبلیو او) اور نیشنل لاجسٹک سیل (این ایل سی) نے شرکت کی۔ بِڈنگ کے عمل میں ایف ڈبلیو او نے 7.3 ارب روپے جبکہ این ایل سی نے 6.5 ارب روپے کی بولی لگائی۔
سی ڈی اے حکام کا کہنا ہے کہ ٹھیکہ باقاعدہ طور پر تفویض ہونے کے بعد این ایل سی کی جانب سے تعمیراتی کام کا آغاز کیا جائے گا۔ یہ منصوبہ 4 ماہ میں مکمل کیا جائے گا۔
منصوبے کی تفصیلات سے آگاہ کرتے ہوئے سی ڈٰی اے حکام کا کہنا تھا کہ 5 کلومیٹر لمبی سڑک مری روڈ نزد قائدِاعظم یونیورسٹی اسٹاپ سے شروع ہو گی اور جوگی بس اسٹاپ مری روڈ پر اختتام پذیر ہو گی۔ وہاں سے 1 کلومیٹر طویل فلائی اوور اس سے منسلک ہو گا جو مری کی جانب بہارہ کہو بازار کے باہر اختتام پذیر ہو گا۔
منصوبے کی تکمیل کے بعد مری اور کشمیر سفر کرنے والوں کو بڑا ریلیف ملے گا کیونکہ بہارہ کہو میں موجودہ مری روڈ پر عوام کو اچھی خاصے ٹریفک کے رش کا سامنا کرنا پڑتا ہے۔ بالخصوص ویک اینڈز پر گاڑیوں کی بڑی تعداد کے باعث ٹریفک کا رش دیکھنے کو ملتا ہے۔
سی ڈٰی اے حکام کے مطابق چند ہفتوں قبل، سی ڈی اے کی ڈویلپمنٹ ورکنگ پارٹی (ڈی ڈبلیو پی) کی جانب سے 7 ارب روپے پر مشتمل پراجیکٹ کے پی سی ون کی منظوری دی گئی۔ این ایل سی نے 6.5 ارب روپے کی بولی لگا کر پراجیکٹ حاصل کر لیا۔
سی ڈی اے چیئرمین کیپٹن (ریٹائرڈ) محمد عثمان یونس کا کہنا ہے کہ ہماری کوشش ہو گی کہ یہ منصوبہ حتمی تاریخ سے قبل مکمل کر لیا جائے۔
مزید خبروں اور اپڈیٹس کیلئے وزٹ کیجئے گرانہ بلاگ۔
