لاہور: لاہور ڈویلپمنٹ اتھارٹی (ایل ڈی اے) کے ڈائریکٹر جنرل احمد عزیز تارڑ نے کہا ہے کہ بڑھتی ہوئی آبادی کے پیشِ نظر لاہور ڈویژن کی ترقی اور اپ گریڈیشن کے لئے نیا ماسٹر پلان 2050 تکمیل کے مراحل کے قریب پہنچ چکا ہے۔
اپنے ایک بیان میں انہوں نے کہا کہ شہری ترقی کے تمام پہلوؤں، تقاضوں اور مطالبات کو زیرِ غور رکھتے ہوئے نیا ماسٹر پلان تیار کیا جا رہا ہے جبکہ اس پلان کا ابتدائی ڈرافٹ جلد ہی پیش کر دیا جائے گا اور اس میں مثبت پیش رفت سے متعلق تمام پہلوؤں کا احاطہ کیا جائے گا جو 2050 تک شہر کی ضروریات کو پورا کر سکے۔
لاہور ڈویژن ماسٹر پلان 2050 کے مطابق شیخوپورہ، ننکانہ اور ضلع قصور میں 49 شہری آبادیوں کے لئے بھی ترقیاتی منصوبوں کو اس پلان میں شامل کیا گیا ہے۔ ایل ڈی اے حکام کے مطابق نیا ماسٹر پلان لاہور ڈویژن کی حدود میں تمام شہری اور دیہی علاقوں کے لئے تیار کیا جائے گا۔
نئے ماسٹر پلان کی تیاری سے ماحولیاتی تحفظ، وسائل کا دُرست استعمال، تاریخی ورثے کا تحفظ، معاشی سرگرمیوں کے فروغ اور شہری آبادی کے حوالے سے تمام حلقوں کی شمولیت کو یقینی بنایا جائے گا۔
مزید خبروں اور اپڈیٹس کیلئے وزٹ کیجئے گرانہ بلاگ۔
