اسلام آباد: شہری ترقی کے ادارے کیپٹل ڈیویلپمنٹ اتھارٹی (سی ڈی اے) نے فنڈز کی کمی کے باعث اسلام آباد رِنگ روڈ پراجیکٹ پر ترقیاتی کام آئندہ مالی سال تک مؤخر کرنے کا فیصلہ کیا ہے۔
حکام کے مطابق مذکورہ منصوبے کے لیے وفاقی حکومت کی جانب سے کیپٹل ڈیویلپمنٹ اتھارٹی (سی ڈی اے) کے آئندہ مالی سال کے بجٹ میں فنڈز مختص نہیں کیے گئے ہیں۔
اسلام آباد رِنگ روڈ پراجیکٹ ممکنہ طور پر سنجانی انٹرچینج سے شروع ہو کر راولپنڈی رِنگ روڈ سے منسلک ہونا تھا۔
پلان کے مطابق اسلام آباد رِنگ روڈ شاہ اللہ دت٘ہ، مارگلا ہلز، بہارہ کہو، ایف سیکٹرز اور کلرسی٘داں سے گزرے گی۔ 50 کلومیٹر طویل مذکورہ شاہراہ کی تعمیر پر لاگت کا کُل تخمینہ 70 ارب روپے لگایا گیا ہے۔
ادھر راولپنڈی کے میگا پراجیکٹس کے فنڈز حکومتی منظوری میں تاخیر اور ضائع ہونے سے بچانے کیلئے پنجاب کے فنانس ڈیپارٹمنٹ کو واپس کرنے کا فیصلہ کیا گیا ہے۔
تقریبا 7 ارب روپے کے قریب فنڈز فنانس ڈیپارٹمنٹ کو واپس کئے جارہے ہیں جبکہ واپس کئے جانیوالے فنڈز میں 4 ارب روپے راولپنڈی رِنگ روڈ اور 3 ارب روپے کچہری چوک ری ماڈلنگ منصوبے کے لیے مختص کیے گئے تھے۔
دونوں منصوبوں کے حوالے سے موجودہ حکومت کی طرف سے ابھی تک کام شروع کرنے کا گرین سگنل بھی موصول نہیں ہوا۔
دونوں منصوبے ایف ڈبلیو او کے پاس ہیں اور دونوں منصوبوں کیلئے 30 جون کے بعد نئے مالی سال کیلئے دوبارہ فنڈز کا اجراء کیا جائے گا۔
مزید خبروں اور اپڈیٹس کیلئے وزٹ کیجئے گرانہ بلاگ۔
