ملک کو شدید تباہی کا سامنا، سیلاب متاثرین کیلئے 70 ارب مختص: وزیراعظم

اسلام آباد: وزیراعظم شہباز شریف نے کہا ہے کہ بدترین سیلاب کے باعث ملک کو شدید تباہی کا سامنا ہے، اس وقت تمام تر توجہ متاثرین کی بحالی اور معیشت کی بہتری پر مرکوز ہے، 70 ارب روپے مختص کر دیئے ہیں جبکہ عالمی برادری بھی بھرپور مدد کررہی ہے۔

ان کا کہنا تھا کہ بے گھر ہونے والوں کی دوبارہ آبادکاری تک چین سے نہیں بیٹھیں گے اور یہ کوشش ہے کہ بحالی کا عمل جلد مکمل ہوجائے۔

میڈیا سے گفتگو کرتے ہوئے شہباز شریف کا کہنا تھا کہ دوست ممالک سیلاب متاثرین کی مدد کر رہے ہیں، امدادی سامان ہوائی جہازوں، ٹرینوں اور بحری جہازوں کے ذریعے پہنچ رہا ہے۔

انکا کہنا تھا کہ پاکستان کے عوام بھی عطیات دے رہے ہیں اور وفاقی اور صوبائی حکومتیں سیلاب سے متاثرہ افراد کی امداد اور بحالی میں اپنا کردار ادا کر رہی ہیں۔

وزیراعظم نے مزید کہا کہ اتحادی وفاقی حکومت نے سیلاب متاثرین کے لئے 70 ارب روپے مختص کیے ہیں اور بے نظیر انکم سپورٹ پروگرام (بی آئی ایس پی) کے ذریعے متاثرہ خاندانوں کو 25 ہزار روپے دیئے جا رہے ہیں۔

شہباز شریف نے کہا کہ حکومت قومی اور صوبائی ڈیزاسٹر مینجمنٹ اتھارٹیز کے ذریعے سیلاب متاثرین کو صاف پانی، خوراک، خیمے اور دیگر ضروری اشیاء فراہم کر رہی ہے، پوری قوم اور مسلح افواج سیلاب متاثرین کی مدد کر رہی ہیں۔

مزید خبروں اور اپڈیٹس کیلئے وزٹ کیجئے گرانہ بلاگ۔