اسلام آباد میں سائیکلنگ ٹریکس کی تعمیر کے لیے 2.8 ارب روپے کی منظوری

اسلام آباد: وفاقی ترقیاتی ادارے کیپیٹل ڈویلپمنٹ اتھارٹی (سی ڈی اے) کی ڈویلپمنٹ ورکنگ پارٹی نے اسلام آباد میں سڑکوں پر سائیکلنگ ٹریکس کی تعمیر کے لیے 2.8 بلین روپے کے پی سی ون کی منظوری دے دی۔ یہ  منصوبہ دو سال کی مدت میں مکمل کیا جائے گا۔

تفصیلات کے مطابق منصوبے کے تحت سی ڈی اے جناح ایونیو اور خیابان اقبال کے ساتھ ساتھ 26 رہائشی سیکٹرز میں تمام موجودہ سروس روڈز اور بڑی سڑکیں تعمیر کرے گا۔ سائیکلوں اور ای بائک کے لیے 150 پارکنگ لاٹس بھی قائم کیے جائیں گے۔ ان پارکنگ لاٹس کو آؤٹ سورس کیا جائے گا۔ اور پرائیویٹ فرمز شہریوں کو کرائے پر ای بائیکس پیش کریں گی تاکہ انہیں مقررہ پٹریوں پر چلایا جا سکے۔

مزید یہ کہ سی ڈی اے کے مطابق کاربن کے اخراج کو کم کرنے اور وفاقی دارالحکومت میں سائیکلنگ کو فروغ دینے کے لیے یہ منصوبہ شروع کیا گیا۔ سی ڈی اے نے کہا کہ صرف 2.73 فیصد آبادی کی عمر 65 سال سے زائد ہے، اس لیے اس منصوبے سے استفادہ حاصل کرے والوں کی اکثریت نوجوان ہے۔ دارالحکومت کے رہائشیوں کی ایک بڑی تعداد پبلک ٹرانسپورٹ، جیسے میٹرو اور وین یا سواری سے چلنے والی خدمات پر انحصار کرتی ہے۔ اس منصوبے سے ان لوگوں کو سہولت ملے گی جو گاڑیوں کے مالک نہیں ہیں۔

علاوہ ازیں اسلام آباد کی سڑکوں پر بائیسکل لین بنانے میں سرمایہ کاری کرنےکا مقصد صرف کاروں پر انحصار کرنے کے بجائے بائیک کو نقل و حمل کے ایک موڈ کے طور پر استعمال کرنے کا ایک قابل عمل آپشن حاصل کرنا ہے۔ اس منصوبے کا مطلوبہ نتیجہ سائیکلنگ کے استعمال میں اضافہ، کاروں پر انحصار میں کمی، گاڑیوں سے گرین ہاؤس گیسوں کے اخراج میں کمی ہے۔ اس کے نتیجے میں اسلام آباد میں ایک پائیدار، ماحول دوست اور مساوی نقل و حمل کا نظام ہے۔

مزید خبروں اور اپڈیٹس کیلئے وزٹ کیجئے گرانہ بلاگ۔