روزانہ 11000 مسافر اورنج بس سروس استعمال کرتے ہیں: سی ڈی اے

اسلام آ باد: وفاقی ترقیاتی ادارے کیپٹل ڈیویلپمنٹ اتھارٹی (سی ڈی اے) نے اورنج لائن میٹرو بس روٹ پر شہریوں کے سفر کی شرح پر اطمینان کا اظہار کرتے ہوئے کہا ہے کہ اورنج لائن میٹرو بس پر روزانہ 11 ہزار سے زائد افراد سفر کر رہے ہیں۔

سی ڈی اے کے ایک حالیہ اجلاس میں دی گئی بریفنگ میں بتایا گیا کہ اس وقت پشاور موڑ سے نیو اسلام آباد انٹرنیشنل ایئر پورٹ تک روٹ پر پندرہ بسیں چل رہی ہیں جن پر اوسطا یومیہ 11464 مسافر سفر کر رہے ہیں۔

اجلاس میں بتایا گیا کہ فی بس اوسط 30 مسافر بنتی ہے جبکہ اس ہفتے کے آخر تک چین سے درآ مد کی گئی 30 نئی بسیں اسلام آباد پہنچ جائیں گی۔

اسلام آباد اورنج لائن میٹرو بس سروس پر 30 جدید بسیں جو رش کے اوقات میں ہر پانچ منٹ بعد جبکہ رش کے بغیر والے اوقات میں ہر آٹھ سے دس منٹ بعد چلائی جائیں گی۔

اورنج لائن میٹرو بس منصوبے کے ٹریک کی کل لمبائی 25.6 کلومیٹر ہے اور اس پر سات بس اسٹیشنز اور نیو اسلام آباد انٹرنیشنل ائیرپورٹ کے قریب ایک پلیٹ فارم تعمیر کیا گیا ہے۔

ابتدائی طور پر سی ڈی اے نے پنجاب میٹرو بس اتھارٹی سے پندرہ اورنج رنگ کی بسیں حاصل کی تھیں۔ ایک اندازے کے مطابق اس سروس کو 25 سے 26 ہزار تک مسافر روانہ کی بنیاد پر استعمال کریں گے۔

واضح رہے کہ پشاور موڑ تا نیو انٹرنیشنل ائیرپورٹ اورنج لائن بس سروس پر ڈِپوز، بس اسٹیشنز اور ٹریکس کی تکمیل کا کام این ایچ اے جبکہ اس روٹ پر چلائی جانے والی بسوں کا انتظام سی ڈی اے نے کیا ہے۔

مزید خبروں اور اپڈیٹس کیلئے وزٹ کیجئے گرانہ بلاگ۔