اسلام آباد: غیرملکی سرمایہ کاروں کے مسائل کے حل کے لیے حکومت کی جانب سے کمیٹی تشکیل دے دی گئی۔
حکام کے مطابق وزیراعظم شہباز شریف کی زیرِ صدارت ہونے والے اجلاس میں ان کی جانب سے غیر ملکی سرمایہ کار کمپنیوں کو درپیش مسائل بالخصوص گوادر فری زون سے متعلق مسائل کے حل کے لیے کمیٹی تشکیل دے دی گئی۔ کمیٹی 10 روز میں سفارشات سمیت جامع رپورٹ وزیراعظم کو پیش کرے گی۔
ملک میں سرمایہ کاری کو بڑھانے کے حوالے سے اعلیٰ سطح کے اجلاس کی صدارت کرتے ہوئے وزیراعظم نے کہا کہ چینی سرمایہ کار کمپنیوں کو ترجیحی بنیادوں پر سہولیات فراہم کی جائیں گی۔ انہوں نے اس موقع پر سی پیک کے منصوبے میں کام کرنے والے چینی اہلکاروں کو ویزوں کے اجراء میں حائل رکاوٹوں کو فوری دور کرنے کی ہدایت کی۔
وزیراعظم نے سرمایہ کاری بورڈ، وزارتِ منصوبہ بندی اور وزارتِ خزانہ کو ہدایت کی کہ وہ سرمایہ کاری کے فروغ کے لیے مشترکہ طور پر ایک جامع منصوبہ تیار کریں۔
حکام کی جانب سے بریفنگ کے دوران وزیراعظم کو بتایا گیا کہ توانائی، انفراسٹرکچر، ریلوے اور دوسرے منصوبوں میں کمپنیوں کی جانب سے 10 ارب ڈالر سے زائد کی سرمایہ کاری کی جا رہی ہے۔ پہلے مرحلے میں ان منصوبوں میں ایک سے دو ارب ڈالر کی سرمایہ کاری متوقع ہے جس سے ملک میں ’ایز آف ڈوئنگ بزنس انڈیکس‘ میں بہتری کے علاوہ روزگار کے 45 ہزار مواقع پیدا ہوں گے۔
مزید خبروں اور اپڈیٹس کیلئے وزٹ کیجئے گرانہ بلاگ۔
